Ducati претстави три ексклузивни SP модели: Panigale V4, Panigale V2 и Streetfighter V4

Ducati ја искористи EICMA 2026 во Милано за претставување на три ексклузивни спортски мотоцикли за 2027 година. Новите Panigale V4 SP, Panigale V2 SP и Streetfighter V4 SP носат опрема развиена со искуството на Ducati во MotoGP и WorldSBK, со посебен акцент на перформансите на тркачката патека.

Ducati Panigale V4 SP – 218 КС и технологии од MotoGP

Panigale V4 SP е наменет за возачи кои сакаат што е можно поблиско искуство до професионален тркачки мотоцикл. Станува збор за нумерирана серија заснована на новиот Panigale V4 MY27.

PANIGALE V4 SP 2027

Мотоциклот го користи Desmosedici Stradale моторот со 218 КС, но најголемата разлика во однос на стандардниот модел е во специјализираната опрема.

Меѓу најважните компоненти се карбонските тркала, сувиот STM EVO-SBK куплунг и Ducati Racing Gearbox со Neutral Lock систем, кој го менува начинот на избор на неутралната брзина со цел да се намали ризикот од случајно вклучување при спортско возење.

Суспензијата е електронски контролирана Öhlins Smart EC 3.0, додека задниот систем на поврзување може да се прилагодува и е изведен од Panigale V4 R.

Новиот аеродинамички пакет вклучува поголеми крилца и таканаречени Corner Sidepods. Според Ducati, крилцата создаваат дополнителна сила на притисок, додека страничните аеродинамички елементи помагаат при минување низ свиоци.

Ducati Panigale V2 SP – Развиен за World Supersport

Panigale V2 SP има поинаква мисија. Тој е создаден како хомологационен модел за новата генерација на Ducati Panigale V2 која од 2027 година ќе се натпреварува во Светскиот шампионат World Supersport.

Развиен е врз основа на Panigale V2 S, со дополнителни подобрувања произлезени од искуството на Lenovo V2 Future Champs Academy.

Двоцилиндричниот V2 мотор со променливо време на отворање на вентилите развива 120 КС.

Меѓу главните модификации се Öhlins суспензијата, продолжената задна вилушка за поголема стабилност, полесните ковани тркала и сувиот куплунг, кој овозможува употреба на специјалното Ducati Corse Performance Oil.

Со оваа комбинација Ducati сака да понуди мотоцикл подготвен за сериозна употреба на патека, но и техничка основа за натпреварувачката верзија во WorldSSP.

Ducati Streetfighter V4 SP – 214 КС без оклопи

Третиот новитет е Streetfighter V4 SP, најексклузивната верзија на спортскиот naked модел на Ducati.

Како и Panigale V4 SP, станува збор за нумерирана серија, препознатлива по традиционалната Winter Test графика.

Streetfighter V4 SP

Desmosedici Stradale моторот развива 214 КС, а опремата вклучува карбонски тркала, сув STM EVO-SBK куплунг, тркачки финален пренос и CNC обработени прилагодливи фусрастери.

Мотоциклот добива електронски контролирана Öhlins суспензија и Brembo MCS главен цилиндар за предната сопирачка со можност за далечинско прилагодување.

Карбонските тркала ја намалуваат масата и ротационата инерција, што позитивно влијае врз управливоста и промената на насоката.

Три мотоцикли со различен карактер

Иако сите ја носат ознаката SP, трите модели имаат различна намена. Panigale V4 SP е насочен кон максимални перформанси на тркачка патека, Panigale V2 SP има директна врска со World Supersport, додека Streetfighter V4 SP ја комбинира спортската технологија со концептот на моќен naked мотоцикл.

Сите три мотоцикли се претставени на EICMA 2026, каде што Ducati ја изложува својата понуда за моделската 2027 година.