Обидот на Сем Сандерленд да постави нов светски рекорд за најбрзо патување околу светот со мотоцикл заврши предвреме, откако неговиот Triumph Tiger 1200 Rally Explorer претрпе оштетување во Австралија.
Двократниот победник на релито Дакар веќе имаше поминато значителен дел од планираната рута и држеше исклучително високо темпо, но техничкиот проблем се покажа како пресериозен за проектот да продолжи во рамките на времето потребно за рекорд.
Сандерленд непосредно пред тоа ја заврши втората етапа, од Бангкок во Тајланд до Куала Лумпур во Малезија, при што помина околу 948 милји, односно нешто повеќе од 1.500 километри, за 15 часа и 33 минути.
Оштетување во Австралија
Проблемите се појавиле за време на минувањето низ австралиската внатрешност, каде мотоциклот претрпел оштетување кое довело до технички дефект.
Тимот се обидел да најде решение и да го врати мотоциклот на пат, но проценката била дека поправката и последователното тестирање ќе одземат премногу време. Со тоа, поставувањето на рекордот повеќе не било возможно.
„За жал, мојот обид за рекорд околу светот заврши. Во австралиската внатрешност мотоциклот претрпе оштетување кое доведе до технички проблем што мораше да се поправи. Направивме сè што можевме за проектот да продолжи, но времето потребно за поправка и правилно тестирање на мотоциклот значеше дека рекордот веќе не беше достижен“, објасни Сандерленд.
Британецот признава дека одлуката била тешка, особено по подготовките и темпото кое го постигнувал во првите денови од обидот.
„Навистина сум разочаран. Луѓето кои ме познаваат знаат дека не се откажувам лесно и ова дефинитивно не беше одлука што ја донесов лесно. Но, понекогаш мора да ја прифатиш ситуацијата таква каква што е“, додаде тој.
Повеќе од 5.300 километри за нешто повеќе од два дена
До моментот кога обидот беше прекинат, Сандерленд имаше поминато 5.317 километри, за само два дена, седум часа и седум минути. Во ова време биле вклучени и периодите за одмор.
И покрај неуспешниот крај на обидот, Сандерленд истакна дека е горд на она што тимот успеал да го постигне и на авантурата во изминатите недели.
„Не беше ова крајот што го посакувавме, но понекогаш и тоа е дел од авантурата. Време е да се вратиме дома“, порача Сандерленд.
Обидот беше изведен со Triumph Tiger 1200 Rally Explorer, а целта беше Сандерленд да стане најбрзиот мотоциклист кој го обиколил светот.
Коментари