Honda официјално потврди дека Red Bull се враќа како спонзор на нејзиниот фабрички MotoGP тим, почнувајќи од сезоната 2027. Оваа соработка, која претходно беше прекината пред четири години по заминувањето на Марк Маркез од HRC, означува нов стратешки чекор за јапонскиот производител во пресрет на воведувањето на новите правила за агрегати од 850 кубика.
Новиот договор меѓу Honda и австрискиот бренд за енергетски пијалаци се очекува да биде со поголем обем од претходниот, при што логото на Red Bull ќе добие позначајна позиција на мотоциклите. Претседателот на HRC, Коџи Ватанабе, истакна дека партнерството е клучно за остварување на амбициите на тимот во новата ера на шампионатот.
Враќањето на Red Bull во Honda ќе предизвика значителни промени во спонзорскиот пејзаж на MotoGP. Додека Red Bull моментално е присутен кај фабричкиот тим на KTM и Tech 3, се очекува неговото присуство кај францускиот тим да се намали од следната година. Истовремено, оваа промена директно влијае на Фабио Квартараро, кој треба да стане главен возач на Honda во 2027 година. Поради конфликтот на интереси меѓу спонзорите, Квартараро ќе мора да ја прекине долгогодишната соработка со Monster, бренд што го поддржува уште од неговото деби во кралската класа во 2019 година.
Според информациите, Honda ги покрила трошоците за обештетување што Квартараро морал да ги плати за предвремено раскинување на договорот со Monster. Овој потег е дел од пошироката маркетинг реорганизација на Honda, која вклучува и специјални дизајни на мотоциклите за одбележување на 60-годишнината од дебито на производителот во најсилната класа во 1966 година.
Steeped in history, ready for the future. A winning partnership is back for 2027. pic.twitter.com/ltjss66yWV
— Honda HRC Castrol - MotoGP (@HRC_MotoGP) October 1, 2026
На другата страна, се очекува Monster да ја заврши улогата на главен спонзор на Yamaha. Компанијата веќе стана главен спонзор на фабричкиот тим на Aprilia во текот на оваа сезона, а задржува и помало присуство во фабричкиот тим на Ducati, каде нивниот договор истекува на крајот на 2027 година. Се шпекулира дека по тој период, Red Bull ќе се обиде да ги привлече Марк Маркез и Педро Акоста назад во својата „палета“ на возачи.
Коментари