Honda го освежи својот предводник во сегментот на турери, Gold Wing Tour, за моделската година 2027. Легендарниот мотоцикл, кој својата 50-годишнина ја прослави во 2025 година, сега доаѓа со три нови бои кои треба да ја нагласат неговата елеганција и препознатлив дизајн.
Моделот останува технолошки предводник, задржувајќи го својот моќен 1.833-кубичен „flat-six“ агрегат со 24 вентили, кој испорачува 93 kW при 5.500 вртежи во минута и 170 Nm вртежен момент при 4.500 вртежи во минута. За 2027 година, Gold Wing Tour е достапен во новите нијанси: Iridium Gray Metallic, Graphite Black и Allumage Blue Metallic.
Развојот на Gold Wing Tour од 2018 година наваму е фокусиран кон создавање на покомпактен, полесен и поагилен мотоцикл, без притоа да се жртвува комфортoт. Алуминиумската рамка е дизајнирана околу предната суспензија со двојна вилушка (double wishbone), која овозможува прецизно управување и стабилност, при што предната вилушка овозможува вертикално движење на предното тркало и покомпактна позиција на моторот. Мотоциклот користи седумстепен менувач со двојна спојка (DCT), кој вклучува и „Walking Mode“ за лесно маневрирање при мала брзина (1,8 km/h напред и 1,2 km/h назад).
Технологија и комфор
Возачкото искуство е поддржано од системот Throttle By Wire (TBW) со четири режими на возење: TOUR, SPORT, ECON и RAIN. Секој режим ги прилагодува испораката на моќност, работата на суспензијата и интегрираниот систем за сопирање (D-CBS). За дополнителна ефикасност, DCT верзијата располага со Idling Stop систем и интегриран стартер-генератор (ISG), кој е за 2,4 kg полесен од стандардниот систем. Моторот е редизајниран во 2018 година, при што е постигната заштеда од 6,2 kg во однос на претходната верзија.
Комфорот е на врвно ниво, со електрично прилагодлив визир, греени седишта и рачки, како и простор за багаж со вкупен капацитет од 121 литар (топ-боксот нуди 61 литар простор). Инструмент таблата е опремена со 7-инчен TFT дисплеј, кој овозможува безжично поврзување со Apple CarPlay и Android Auto преку Wi-Fi. Резервоарот за гориво од 21 литар овозможува солидна автономија со просечна потрошувачка од 5,4 литри на 100 километри.
Клучни спецификации
- Мотор: 1.833 кубика, 6-цилиндричен, 24 вентили
- Моќност: 93 kW @ 5.500 вртежи
- Вртежен момент: 170 Nm @ 4.500 вртежи
- Тежина: 393 kg (верзија со DCT и Airbag)
- Стандард: EURO5+
- Капацитет на резервоар: 21 литар
Коментари