Ducati ја претстави новата Multistrada V4 S Grand Tour, верзија создадена за возачите кои сакаат долги патувања без дополнително да ја доопремуваат машината. Радарски систем, странични куфери, греани седишта и рачки, дополнителни LED светла и електронска полуактивна суспензија доаѓаат како стандарден дел од пакетот.
Multistrada одамна е моделот со кој Ducati се обидува да ги спои спортскиот карактер на марката со вистинска употребливост на долги дистанци. Новата Multistrada V4 S Grand Tour оди уште еден чекор понатаму и од фабрика доаѓа подготвена практично за сè што би му било потребно на еден возач за повеќедневно патување.
Името Grand Tour не е ново за Ducati. Италијанскиот производител го користи за верзиите кај кои акцентот е ставен на комфорот, автономијата и опремата, а новиот модел продолжува во истиот правец со уште побогат стандарден пакет.
Радар напред и назад, куфери и греана опрема како стандард
Најголемата разлика во однос на обичната Multistrada V4 S е токму опремата што Ducati ја вклучува фабрички.
Multistrada V4 S Grand Tour стандардно добива преден и заден радар, преку кои функционираат Adaptive Cruise Control, Blind Spot Detection и Forward Collision Warning.
Во пакетот влегуваат и TPMS систем за следење на притисокот во гумите, дополнителни LED светла, динамични трепкачи и задно светло за магла.
За патувањата се грижат и два странични куфери од технополимер со вкупен капацитет од 60 литри. Тие се визуелно интегрирани со бојата на мотоциклот, а стандардниот централен штендер го олеснува нивното монтирање и користење.
Во стандардната опрема се вклучени и греани рачки, греано седиште за возачот и совозачот, како и hands-free капаче за резервоарот.
Посебен Grand Tour изглед
Новата верзија добива и сопствен визуелен идентитет.
Каросеријата е во посебна Grand Tour графика со црвени детали, додека рамката, swingarm-от, горните носачи на вилушката, рачките и страничните куфери се завршени во црна боја.
На тркалата стои Grand Tour ознака, а седиштата за возачот и совозачот исто така имаат посебни детали.
V4 Granturismo со 170 КС
Механички, основата останува добро познатиот 1.158 cc V4 Granturismo мотор, усогласен со Euro 5+ стандардот.
Четирицилиндричниот агрегат испорачува 170 КС при 10.750 вртежи во минута и максимален вртежен момент од 123,8 Nm при 9.000 вртежи.
Моторот користи Extended Cylinder Deactivation, систем кој може да го исклучи задниот ред цилиндри не само кога мотоциклот стои во место, туку и во одредени услови при возење.
Според Ducati, ова овозможува намалување на потрошувачката и емисиите до шест проценти во однос на претходната генерација, без промена на перформансите кога е потребна целата сила на моторот.
V4 Granturismo користи и контра-ротирачко коленесто вратило, решение кое помага да се намали дел од жироскопскиот ефект на тркалата и придонесува за полесно менување правец.
Автоматски се спушта при мала брзина
Една од практичните технологии кај Grand Tour е Automatic Lowering Device.
Кога брзината ќе падне под 10 km/h, системот автоматски ја спушта висината на мотоциклот до 30 mm, со што се олеснува маневрирањето при паркирање и запирање. Кога брзината ќе надмине 50 km/h, суспензијата повторно се враќа во нормалната положба.
Тука е и Easy Lift, систем кој при вклучување на мотоциклот ја отвора хидрауликата на суспензијата и ја намалува силата потребна за подигање на мотоциклот од страничниот штендер.
Ducati Skyhook Suspension EVO
Multistrada V4 S Grand Tour ја користи полуактивната Ducati Skyhook Suspension EVO суспензија на Marzocchi.
Системот работи заедно со инерцијалната платформа и нов сензор за положбата на вилушката, а функцијата Bump Detection може во реално време да ја приспособува суспензијата според состојбата на подлогата.
Auto-levelling автоматски ја препознава оптовареноста на мотоциклот и ја приспособува поставеноста во зависност од тоа дали се вози соло, со совозач или со багаж.
Предната суспензија има 170 mm од, а задната 180 mm.
Електроника на највисоко ниво
Ducati го опремува Grand Tour и со најновата генерација на своите електронски системи.
Ducati Vehicle Observer користи виртуелни сензори за да ги процени силите кои дејствуваат на мотоциклот и со тие податоци дополнително да ги усоврши работата на Cornering ABS и Ducati Wheelie Control.
Electronic Combined Braking System ја распределува силата на сопирање меѓу предното и задното тркало според условите и оптоварувањето.
Во случај на нагло сопирање, Ducati Brake Light EVO може автоматски да ги активира и трепкачите за подобра видливост кон возилата позади.
Стандардната електроника вклучува и Ducati Traction Control, Ducati Wheelie Control, Engine Brake Control, Vehicle Hold Control, Ducati Quick Shift Up & Down и пет режими на возење: Sport, Touring, Urban, Wet и Enduro.
6,5-инчен TFT и навигација преку телефон
Пред возачот се наоѓа 6,5-инчен TFT дисплеј во боја. Преку Ducati Connect системот, телефонот може да се поврзе со мотоциклот и дисплејот да се користи за навигација со мапи, музика и телефонски функции.
До 60.000 km без проверка на вентилите
Еден од посилните адути на V4 Granturismo остануваат долгите сервисни интервали.
Проверката на вентилите е предвидена на секои 60.000 километри, што е особено важно кај мотоцикл чија главна намена се долги патувања.
Во Европа Ducati го нуди и програмот 4EVER Ducati, со четиригодишна гаранција без ограничување на километражата.
Roadside Assistance пакетот, пак, вклучува помош на пат, транспорт на возачот и совозачот, заменско возило и, во одредени ситуации, хотелско сместување.
Може дополнително да се персонализира од фабрика
Иако Grand Tour веќе доаѓа со сериозно ниво на стандардна опрема, преку програмата Ducati Factory Made купувачите можат дополнително да го конфигурираат мотоциклот уште пред испораката.
Меѓу опциите се различни бои на сопирачките клешти, седишта и суспензија со различна висина, како и карбонски детали.
Во Европа од ноември
Новата Ducati Multistrada V4 S Grand Tour ќе пристигне во европските Ducati салони од ноември 2026 година и ќе се нуди исклучиво во Grand Tour графиката.
Ducati со Grand Tour не се обидува да измисли нова Multistrada, туку да направи фабрички комплетирана верзија на веќе добро познатиот V4 S. За возачите што планираат долги патувања, најважната разлика е што речиси сè што нормално би се додавало од каталогот за дополнителна опрема овде веќе е вклучено.
Коментари