Како „Сејф Сити“ ќе ги опфати моторите и скутерите?

Со почетокот на новата мото-сезона, системот „Безбеден град“ (познат во јавноста како „Сејф Сити“) станува една од најактуелните теми меѓу моторџиите. Поради бројните дилеми што се појавија во јавноста, побаравме официјални појаснувања од МВР за тоа како системот ќе функционира кога станува збор за моторите и скутерите.

Детекција на мотоцикли – од каде и како?

Системот користи камери поставени на различни позиции, кои овозможуваат детекција и идентификација на возила и од предната и од задната страна, зависно од локацијата на камерата. 

Кај мотоциклите, идентификацијата се врши преку задната регистарска табличка, логично, со оглед на тоа што таа единствено е поставена на задната страна. Тоа значи дека мотоциклите иако имаат само една табличка, и тие се целосно опфатени со системот, исто како и автомобилите.

Дали и скутерите се опфатени?

Да. Сите моторни возила што учествуваат во сообраќајот, вклучително и мопедите (скутери до 50cc) иако имаат помала табличка од останатите мотоцикли, се опфатени со системот.

Со други зборови, фактот што станува збор за „само 50-ка“ не значи дека не е под надзор.

Сите моторни возила што учествуваат во сообраќајот, вклучително и скутери до 50cc, се опфатени со системот

Што со мопедите со трајна регистрација?

Податоците за сопственост се водат во службената евиденција и се ажурираат при секоја промена на сопственост.

Обврска на сопственикот е навремено да ја пријави секоја промена, независно од тоа дали возилото оди на годишен технички преглед. Дополнително, мопедите подлежат на обнова на осигурителна полиса, што исто така претставува механизам за ажурирање на податоците.

Практично, „трајна регистрација“ не значи дека системот нема податоци за сопственикот.

Казни – дали важат истите правила за сите?

Во најголем дел од случаите, глобите се утврдени според видот на прекршокот, а не според категоријата на возилото.

Тоа значи дека за ист прекршок, мотоцикл и автомобил се санкционираат според истите законски одредби – освен ако со закон не е поинаку пропишано.

Покривање, оштетување или користење изменета/неважечка регистарска табличка претставува прекршок и се санкционира со парична глоба и дополнителни законски последици.

Исто така, учество во сообраќај без поставена регистарска табличка е прекршок за кој се предвидени парични казни и соодветни мерки согласно важечките прописи.

Со други зборови – „креативни решенија“ со свиткани, скратени или намерно покриени таблички можат скапо да чинат.

Според законот за безбедност на сообраќајот на патиштата, во однос на регистрацијата на мотоциклот и истакнувањето на регистарската табличка предвидени се следните казни:

Возењето со скриена или преправена табличка носи сериозни казни доколку ве запрат

Во однос на управувањето мотоцикл без соодветна документација, непочитување на сигнализација и слични престапи, предвидени се следните казни:

Носењето кацига е задолжително за сите возачи на скутери и мотори, па доколку пред извесен период имаше „дупка“ во законот која не ве обврзуваше на тоа, сега полицијата сигурно ќе ве казни доколку ја носите на било кој друг начин освен онака како што е наменета, на вашата глава. Носењето кацига е задолжително за возачите на велосипеди со помошен мотор, мопеди и мотоцикли. Доколку не носите кацига, освен што си го доведувате животот во опасност, можете да се соочите и со следните казни.

Системот не го препознава (не)носењето кацига, но таа е задолжителна по закон. Носете кацига!

Десна лента е задолжителна за мопеди

Според законските одредби, мопедите се должни да се движат што поблиску до десниот раб на коловозот, освен кога условите во сообраќајот или извршување на одредени маневри налагаат поинаку (на пример при вртење лево).

Доколку се утврди прекршување на овие правила, може да биде изречена санкција согласно закон. Тоа значи дека и ова правило е дел од системот на контрола.

Во превод, со скутер не смеете да возите во левата лента по булевар.

Малолетни сопственици – кој одговара?

Доколку возилото е регистрирано на малолетно лице, постапката се води согласно прописите што се однесуваат на малолетници. Во одредени случаи, одговорност може да има законскиот застапник, зависно од видот на прекршокот и конкретните околности.

Црна статистика: 2025 беше најтешката година за мотоциклистите во последните 5 години.

Целта не е казнување, туку безбедност

Според МВР, целта на системот „Безбеден град“ е зголемување на безбедноста во сообраќајот и намалување на бројот на сообраќајни незгоди преку доследна примена на законските прописи.

За мотоциклистите ова значи едно: правилата важат подеднакво за сите.

Сезоната допрва почнува – а најдобриот начин да ја поминеме без проблеми е со почитување на прописите и со одговорно однесување на патиштата.