Булега повторно го запиша своето име во историјата на WSBK

Николо Булега (Aruba.it Racing – Ducati) повторно го запиша своето име во историјата на Мотул Светскиот Супербајк Шампионат, откако стана првиот возач што ги добил првите 12 трки во една сезона.

Бројот 11 го победи својот тимски колега Икер Лекуона за 2.5 секунди и ја освои својата 16-та последователна победа, низа што трае уште од крајот на сезоната 2025. Во меѓувреме, Јари Монтела (Barni Spark Racing Team) се врати на подиумот на трките одржани на патеката Балатон Парк во Унгарија.

Булега имаше добар старт кога се изгасија светлата, исто како и неговиот тимски колега Лекуона, но бројот 7 не нападна во свиокот 1; сепак, тој остана блиску и вршеше притисок во раните фази од 21-кружната трка. Разликата меѓу нив никогаш не надмина една секунда, а Лекуона се доближи на половина секунда на почетокот од петтиот круг. Дури на крајот од 12-тиот круг Булега успеа да ја зголеми предноста над една секунда, возејќи три десетинки побрзо од Шпанецот. Но веќе следниот круг Лекуона повторно беше под една секунда, продолжувајќи да притиска, иако само еден круг подоцна разликата повторно беше над една секунда, со што бројот 11 ја задржа контролата врз трката. До крајот, Булега ја зголеми предноста на повеќе од две секунди и ја освои својата 16-та последователна победа и 12-та по ред во сезоната 2026 – што значи дека сега го држи рекордот за најдобар старт на една сезона. Со својата 32-ра победа, тој влезе во топ 10 најуспешни возачи во историјата на WorldSBK, а ова е и негов 25-ти последователен подиум – израмнувајќи го рекордот на Топрак Разгатлиоглу и Колин Едвардс. За Лекуона, ова беше негово деветто последователно второ место, што е втора најдолга низа; рекордот го држи Џонатан Реа со десет втори места по ред во 2019 година.

Додека двата фабрички Ducati беа далеку напред, Јари Монтела (Barni Spark Racing Team) мирно возеше кон својот втор подиум во WorldSBK, искористувајќи ја конфузијата во раните кругови. Ова е негов прв подиум по Австралија, откако заврши петти и четврти во текот на унгарскиот викенд. Зад него беше Лоренцо Балдасари (Team GoEleven) на четвртото место, а Герет Герлоф (Kawasaki WorldSBK Team) заврши петти – негов прв топ-5 резултат по Арагон 2024.

СЕМ ЛОУС СЕ ВРАЌА ДО П6: Британецот се пробива напред, Сура повторно во топ седум

Сем Лоус (ELF Marc VDS Racing Team) се проби од четвртиот ред до шесто место, пред Алберто Сура (Motocorsa Racing) кој заврши седми. Бројот 67 повторно го покажа својот потенцијал, борејќи се со Герлоф и Лоус. Герлоф го помина на 11-тиот круг во свиок 9, а Лоус на 15-тиот круг во свиок 5. Таран Мекензи (MGM Optical Express Racing) заврши осми, додека борбата за деветтото место беше решена во последните метри меѓу тимските колеги од GYTR GRT Yamaha WorldSBK Team – Реми Гарднер и Стефано Манци; Гарднер го победи Манци за само 0.074 секунди.

БАУТИСТА ПАЃА НАЗАД: Казна го исфрла бројот 19 од топ десет

Алваро Баутиста (Barni Spark Racing Team) стартуваше од четвртото место, но заврши 11-ти поради проблеми во раните кругови и голема борба со Балдасари, а потоа доби и казна (Long Lap Penalty) во завршницата за сечење на патеката во свиок 9 без да изгуби 1 секунда. Тој заврши пред сонародникот Чави Виерж (Pata Maxus Yamaha) на 12-то место, додека Бахатин Софуоглу (Motoxracing WorldSBK Team), неговиот тимски колега Матија Рато и Сомкиат Чантра (Honda HRC) ги освоија последните бодови. Јуки Куни (Honda HRC) заврши 16-ти, како последен класициран.

ОТКАЖУВАЊА ВО ТРКАТА 2: Четворица возачи не го дочекаа крајот

Андреа Локатели (Pata Maxus Yamaha) излета од трката на крајот од вториот круг во свиок 17, по што беше пренесен во медицинскиот центар. Дијагностицирана му е контузија и абразија на левиот колк. Набргу потоа, Аксел Басани (bimota by Kawasaki Racing Team) се повлече поради технички проблем. Томи Брајдуел (Superbike Advocates) се откажа по пад во шикана 9–10 на петтиот круг. Алекс Лоус (bimota by Kawasaki Racing Team) го бркаше Мекензи за шесто место, но ја загуби предната гума во свиок 10 и ја заврши трката во осмиот круг.

За целата галерија од трките кликнете овде.

Пласман во шампионатот по четвртата рунда:

1. Николо Булега (Aruba.it Racing – Ducati) – 248 поени

2. Икер Лекуона (Aruba.it Racing – Ducati) – 166

3. Сем Лоус (ELF Marc VDS Racing Team) – 99

4. Мигел Оливеира (ROKiT BMW Motorrad WorldSBK Team) – 85

5. Јари Монтела (Barni Spark Racing Team) – 82

6. Алекс Лоус (bimota by Kawasaki Racing Team) – 82