Валентино Роси го заврши првиот тест како возач на Petronas Yamaha на 20-тото место.

Кратко траеше медениот месец за Валентино Роси и Petronas Yamaha. Откако заврши на дваесетото место за време на вториот ден од тестот во Катар, Италијанецот вели дека тимот треба да се врати на почеток и да почнат да се движат по друг правец со цел да бидат подготвени за вториот и последен тест.

„Позицијата која ја освоивме не беше најдобра а исто така не сум задоволен и од времето кое го постигнав. Но денеска искрено не се чуствував добро на мотоциклот“, вели Роси. „Пред крајот на тестот за жал имав проблеми со мотоциклот и не можев да го нападнам најдобриот резултат.“

„Главен проблем е тоа што не бев доволно брз. Мораме заедно да ги погледнеме податоците и да пробаме нешто ново на следниот тест.“

42 годишниот возач кој првиот ден од тестирањето го заврши на четиринаесетото место додаде: „Имаме проблеми со пневматиците, со контактот на гумите со површината. Пробавме неколку работи но за жал тие се покажаа како неуспешни.“

„Имаме голем проблем и со забрзувањето. Во следните два дена ќе ги разгледаме податоците кои ги собравме и ќе се обидеме да бидеме конкурентни на следниот тест.“

Можеби она што најмногу загрижува е впечатокот на Роси за новата шасија.

„Ги користевме двете шасии. Мојот впечаток е дека новата шасија е многу слична со онаа која ја имавме минатата година кај фабричкиот мотоцикл. Таа не е многу слична со онаа од сезоната 2019. Може да се каже дека е нешто помеѓу. Но како возач, се чуствувам исто како на мотоцикот со кој настапував минатата сезона.“

Маверик Вињалес изјави дека се уште не ја пробал новата шасија а Фабио Куартараро даде сличен одговор како и Роси.

„Се уште го немам истото чуство како во минатото но се надевам дека за брзо време ќе се појави. Работиме напорно и мислам дека шасијата кај мотоциклот од 2019-та година беше фантастична“, вели Французинот.

„Сакаме да се движиме по таа насока. Можеби се движиме по тој правец, но чуството се уште не е исто. Имаме уште неколку дена да се подобриме.“

Но и покрај резултатот, Роси вели дека е задоволен од брзината која ја покажале неговите колеги кои настапија со М1. „Денеска Куартараро и Маверик беа навистина силни а добар настап имаше и Франко.“

„Докторот“ вели и дека извозел и неколку круга со тест возачот на Yamaha, Кал Кратчлоу.

„Поминав неколку круга со Кал на почетокот на сесијата. Зборував со него но исто така зборував и со главниот механичар, Силвиано Галбусера. Двајцата ми кажаа некои интересни информации.“

„Тој е брз возач и има интересни идеи бидејќи долго време настапуваше со машината на Honda. Мислам дека многу ќе ни помогне.“

За прв пат откако е дел од MotoGP, Роси се најде зад Лука Марини.

„Зборував со него денеска. Тој е многу среќен. Добро вози и направи голем напредок во споредба со претходниот ден. Мислам дека ова беше позитивен настап за него“, вели Роси.

Последниот претсезонски тест во Катар почнува во Среда.