Дани Педроса дојде до 27-та победа во својата кариера, прва по онаа во Брно во 2014 година, откако стартуваше од шестата позиција на патеката Мотеги за ГН на Јапонија.

Дани Педроса дојде до 27-та победа во својата кариера, прва по онаа во Брно во 2014 година, откако стартуваше од шестата позиција на патеката Мотеги за ГН на Јапонија.

Втор низ целната линија помина Валентино Роси, тој го забележа 14-от подиум во сезоната и ја зголеми предноста во генералниот пласман пред Лоренцо на 18 бода. Лоренцо повторно се искачи на пиедесталот, овој пат како трет, со што дојде до неверојатни 94 подиуми во кариерата.

Трката во Јапонија беше интересна пред се заради временските услови, утринските загревачки сесии беа одложени за 2 часа заради дождот, но трката започне во предвидениот термин. По стартот на трката никој не можеше да предвиди што ќе се случи, Роси излезе на чело на колоната во првиот свиок, но веќе во вториот го пропушти Лоренцо напред. Иако навидум се беше решено откако во следните неколку круга Лоренцо направи предност од 3 секунди пред Роси, сепак до крајот следевме возбудлива трка со сосема различен исход. 

Во првиот дел од трката изгледаше како Роси да нема одговор на темпото на Лоренцо, а истовремено требаше да се брани и од Довициозо кој беше зад него. Во меѓувреме Педроса беше најбрз на патеката и успеа од шестата стартна позиција да дојде до четвртото место, за во 11-от круг да го помине и Довициозо. Иако во моментот Роси имаше предност од 2,7 секунди пред него, тој започна со своето темпо и возење кое се покажа како одлично.

Намалувајќи по 1,5 секунди во круг, до 9 круга пред крајот Педроса успеа да го стигне Роси, а Лоренцо очигледно имаше проблеми со трошењето на предната гума. Педроса го помина Роси но двајцата продолжија кон Лоренцо кој во тој момент беше 2,7 секунди пред нив. На 17-от круг Педроса без проблем го помина Лоренцо на правецот во Мотеги, и не ја загуби предноста до крајот на трката.

Возачите на Јамаха кои беа практично без предни гуми имаа тешка задача, ризикот и наградата која беше пред нив беше доволен мотив да следиме возбудливи последни кругови. Со грешката која ја направи Лоренцо во свиокот број 3 на 5 круга до крајот му ја подари втората позиција на Роси, кој потоа рутинирано заврши со предност од 3 секунди пред Лоренцо.

Во генералниот пласман Валентино Роси има 283 бодови, 18 повеќе од Лоренцо, а на третата позиција е Марк Маркез со 197 бодови. До крајот на шампионатот преостануваат уште 3 трки: Филип Ајленд (Австралија) на 18-ти октомври, Сепанг (Малезија) на 25-ти октомври и Валенсија - Рикардо Тормо (Шпанија) на 8-ми ноември.