127 млади возачи во борба за место во Red Bull MotoGP Rookies Cup 2027

Една од најважните скалила на патот кон MotoGP повторно ја започнува потрагата по идните ѕвезди на светскиот мотоциклизам. Вкупно 127 млади возачи од 45 земји се поканети на селекцискиот настан за Red Bull MotoGP Rookies Cup 2027, кој ќе се одржи во Guadix, во јужниот дел на Шпанија.

Селекцијата ќе се одржи во текот на три дена. Приближно половина од кандидатите ќе излезат на патеката во првиот ден, а останатите во вториот. По првите две групи, четиричлената селекциска комисија ќе одлучи кои возачи ќе добијат можност повторно да возат во третиот, одлучувачки ден. Од нив потоа ќе биде составена кратката листа на возачи кои ќе добијат покана за настап во Red Bull MotoGP Rookies Cup во сезоната 2027.

Конкуренцијата е огромна. Во првите две децении од постоењето на купот низ него поминале 277 возачи од 46 различни земји, а многумина од нив подоцна стигнаа до Moto3, Moto2 и MotoGP.

Како воопшто се стигнува до селекцијата?

Патот не започнува директно во Guadix. Секој заинтересиран млад возач најпрво мора да поднесе онлајн пријава преку официјалната страница на Red Bull MotoGP Rookies Cup.

За селекцискиот процес за сезоната 2027 право на пријава имаа возачи родени меѓу 1 јануари 2008 и 31 март 2012 година. Крајниот рок за пријавување беше 15 септември 2026, но организаторите отворено потенцираат дека раното пријавување може да биде предност бидејќи на тој начин имаат повеќе време да го следат развојот и резултатите на кандидатот во текот на сезоната.

Самото пополнување на пријавата не значи и автоматска покана за селекцијата. Организаторите ги анализираат резултатите, шампионатите во кои настапуваат возачите, нивниот напредок и претходното искуство, а потоа одлучуваат кој ќе добие покана за Selection Event.

Интересно е што кандидатот не мора задолжително да доаѓа од класичниот брзински мотоциклизам. Red Bull наведува дека се зема предвид и искуството во мотокрос, dirt track, speedway и други дисциплини во кои младите возачи можат да развијат контрола на мотоциклот и натпреварувачки способности кои подоцна се пренесуваат на асфалт.

Не постои ниту фиксен лимит за висина и тежина, но поради природата на Moto3 мотоциклите организаторите посочуваат дека најуспешните кандидати најчесто се под 172 сантиметри и 62 килограми. Но тоа не е правило кое автоматски дисквалификува повисок или потежок возач.

Кој ги избира идните Rookies?

За одлуката е задолжена четиричлена комисија составена од луѓе со огромно искуство во мотоциклизмот:

• Gustl Auinger – поранешен Гран При возач и победник на трки;
• Harald Bartol – поранешен Гран При возач и еден од најпознатите инженери во малите класи;
• Peter Clifford – долгогодишен MotoGP експерт и директор за развој на возачите;
• Daniel Ribalta – тренер на возачите во Rookies Cup.

Тоа значи дека селекцијата не е само мерење кој ќе направи најбрз круг. Се оценуваат способноста на возачот, начинот на кој се адаптира, потенцијалот за понатамошен развој и целокупниот впечаток што ќе го остави во текот на тестот.

Бугарин и двајца Словенци меѓу кандидатите

Од непосредните соседи на Македонија, годинава на листата има претставник од Бугарија – Никола Николаев. Нема кандидати од Македонија, Србија, Грција или Албанија.

Од поширокиот регион интересни за нас се и двајцата претставници на Словенија – Тиан Кршеван и Нејц Петрич, како и Унгарецот Тамаш Лукас.

Балканот и регионот досега немале голем број претставници во ова натпреварување, но има примери кои покажуваат колку голем чекор може да биде самото поминување на селекцијата. Хрватскиот возач Мартин Вугринец во 2014 година се избори за место во купот и во сезоната 2015 настапуваше во Red Bull MotoGP Rookies Cup. Тој подоцна самиот ја опиша селекцијата како долготраен и исклучително строг процес, а веќе самата покана за тестот ја сметал за значаен успех.

Од поширокиот балкански регион низ оваа школа поминаа и турски возачи како Чан Ончу и Дениз Ончу, кои подоцна продолжија кон светската сцена и се одличен пример колку значајна отскочна даска може да биде Rookies Cup.

Од Rookies Cup до светски шампиони

Причината поради која селекцијата привлекува толку големо внимание е едноставна – Red Bull MotoGP Rookies Cup одамна не е само младински шампионат, туку еден од најдокажаните патишта кон Grand Prix мотоциклизмот.

Низ него поминале имиња како Хорхе Мартин, Педро Акоста, Јохан Зарко, Бред Биндер, Мигел Оливеира и многу други возачи кои подоцна стигнаа до највисоките категории. Во осум од последните десет сезони Moto3 светскиот шампион бил поранешен учесник во Rookies Cup, а во 2024 година поранешни Rookies ги освоија титулите во сите три Grand Prix категории.

Возачите во купот настапуваат со идентични KTM машини со Moto3 спецификација, што ја намалува разликата во опремата и го става акцентот на талентот, адаптацијата и работата на самиот возач. Од 2013 година се користи четиритактниот KTM RC 250 R, откако во првите шест сезони се возеше двотактниот KTM RC 125.

127 кандидати за Red Bull MotoGP Rookies Cup 2027

Комплетната листа на поканети возачи, поделена по земји:

Од овие 127 кандидати само мал дел ќе го поминат последниот ден од селекцијата, а уште помал број ќе добијат место на стартната решетка за сезоната 2027. Но, ако историјата на Red Bull MotoGP Rookies Cup нè научила нешто, тоа е дека меѓу имињата на оваа листа многу веројатно се наоѓаат дел од возачите кои за неколку години ќе ги гледаме и во светскиот шампионат.