Тимот на Pertamina Enduro VR46 Racing Team и оваа година ја продолжува традицијата на Индонезиското ГП, настапувајќи со уникатен дизајн на своите Ducati Desmosedici GP мотоцикли. Ова е трета година по ред како тимот од Тавулија подготвува специјална боја за трката што ја сметаат за свој втор дом.
Новиот изглед, кој беше официјално претставен во производствениот погон на Pertamina Lubricants во Џакарта, е инспириран од митолошкото суштество Гаруда. Овој симбол, кој има длабоки корени во хиндуистичката и будистичката митологија, претставува амблем на Република Индонезија и ја симболизира храброста и борбениот дух.
Дизајнот зад кој повторно стојат Алдо Друди и студиото Drudi Performance, е целосно прилагоден на индонезиската култура. Мотивот на Гаруда е вешто вклопен во силуетата на Ducati Desmosedici GP, при што раширените крилја се протегаат по двете страни на мотоциклот, додека главата на митолошкото суштество е позиционирана на резервоарот за гориво.
Визуелниот идентитет е дефиниран со комбинација од бела боја како позадина и црвена боја што го претставува Гаруда, надополнети со детали во златни пламени. Препознатливата флуоресцентно жолта боја на тимот останува присутна на оклопот, обезбедувајќи визуелен континуитет со стандардниот изглед на екипата.
Покрај мотоциклите, промени има и во опремата на тимот. За време на викендот во Мандалика, членовите на екипата ќе носат специјално дизајнирани маици од брендот Kappa, кои го следат истиот графички мотив и колорит, како и соодветни капи во истите бои.
Коментари