MotoGP: Трета победа по ред за Маркез

Возачот на Хонда и актуелен Светски шампион во МотоГП дојде до третата победа во низа во сезоната.

Возачот на Хонда и актуелен Светски шампион во МотоГП дојде до третата победа во низа во сезоната.

Третата трка во сезоната која се возеше во Аргентина донесе возбудлива трка во која Хонда забележа 1-2 победа, а тимот на Јамаха иако имаше свој предводник преку Хорхе Лоренцо, на крајот мораше да се задоволи со 3 и 4 позиција.

Следевме возбудлива трка од самиот почеток во кој најголемо изненадување беше Андреа Ианон кој возеше на втората позиција, зад Лоренцо. Во групата која беше на чело ги следевме и Валентино Роси, Штефан Брадл па дури потоа Дани Педроса. Валентино Роси повторно потсети на оној стар „Доктор“ кој сите го сакаат, имаше одлично возење но направи 2 грешки кои го враќаа од втората на паттата односно шестата позиција. За Роси дополнителен проблем претставуваше и Брадл кој направи грешка при кочењето што го оддалечи Роси од пиедесталот.

Дани Педроса конечно покажа возење какво што посакуваат неговите фанови, од шестата позиција успеа да дојде до третата на два круга пред крајот, за потоа со агресивен маневар да го помине и Лоренцо за 1-2 победа за Хонда. Лоренцо заминува од Аргентина со испуштена победа и само трета позиција, иако возеше на првата позиција се до 8 круга пред крајот на трката. Рака на срце Лоренцо и не можеше да го издржи темпото кое Маркез потоа го наметна.

Марк Маркез продолжува со фантастичните возења во МотоГП, три победи во три трки и максимални 75 бодови во генералниот пласман само покажуваат дека останатите „вонземјани“ и тоа како ќе треба да се помачат да му ја одземат титулата.

Како што стојат работите во моментот, Маркез е на одличен пат да ја одбрани титулата.

Шампионатот продолжува следната недела (4-ти мај) со трката на патеката Херез во Шпанија.