Маверик Вињалес ќе се врати на MotoGP патеките овој викенд на Големата награда на Јапонија, откако успешно го заврши најважниот дел од рехабилитацијата по операцијата на рамото.
Од тимот Red Bull KTM Tech3 потврдија дека шпанскиот возач добил дозвола повторно да настапува, па на патеката Mobility Resort Motegi повторно ќе му се придружи на Енеа Бастианини.
Вињалес беше надвор од трките по Големата награда на Германија во јули, поради компликации поврзани со претходната повреда на рамото. По корективната операција следуваше подолг период на рехабилитација, во координација со неговиот медицински тим, KTM и Tech3.
По дополнителните медицински и физички тестирања во Red Bull Athlete Performance Centre, Вињалес добил зелено светло за враќање на патеката.
За време на неговото отсуство, тест и резервниот возач на KTM Пол Еспаргаро го заменуваше на неколку тркачки викенди. Сега, со враќањето на Вињалес, Tech3 повторно ќе настапува со својата стандардна возачка постава во завршниот дел од сезоната.
Вињалес: „Сè уште не сум на 100 проценти“
Шпанецот вели дека е задоволен што конечно може да се врати на тркање, но нагласува дека неговата физичка подготовка сè уште не е целосно завршена.
„Навистина сум среќен што конечно можам да кажам дека се враќам на тркање. Последните неколку месеци беа долг процес и секој ден работев напорно за да стигнам до оваа точка.
Сè уште не сум на 100 проценти, но сум на вистинскиот пат и се чувствувам подготвен за следниот чекор. Во Мотеги ќе одиме постепено, ќе видиме каде сум физички и ќе работам повторно да го вратам чувството на мотоциклот“, изјави Вињалес.
Тој им се заблагодари на медицинскиот тим и на персоналот во Red Bull APC за поддршката во текот на рехабилитацијата.
Tech3 без брзање при враќањето
Тимскиот менаџер Николас Гојон истакна дека приоритет во целиот процес бил Вињалес да се врати дури кога ќе биде навистина подготвен.
„Патот беше подолг отколку што очекувавме, но Маверик работеше исклучително напорно за време на рехабилитацијата. Одлично е што повторно е подготвен да се врати на гридот.
Знаеме дека враќањето по толку долг период ќе бара време, па ќе му дадеме целосна поддршка во текот на викендот за постепено да го врати својот ритам“, изјави Гојон.
Враќањето на Вињалес доаѓа токму на почетокот на прекуокеанскиот дел од сезоната, а првата цел во Мотеги ќе биде постепено враќање на брзината и физичката форма, без непотребен ризик.
Коментари