Електрониката е насекаде околу нас и модерните моторцикли зависат од неа комплетно. Дали е тоа добро?

Дигиталната револуција ветува полесен живот; камери кои сликаат само кога сите се смеат, микробранови кои ветуваат прецизно одмрзнување на вашата вечера, но дали некој всушност побара било што од ова? Кога станува збор за мотоциклите, дали електрониката навистина помогна или цената на технологијата ги отргна луѓето од овој порано ефтин и лесен начин на стигнување од едно до друго место.

Прво беше вбризгувањето на гориво, но дали нуди нешто што некој навистина го вреднува? Дали повеќето мотоциклисти знаат или се грижат како горивото влегува во моторот? Тоа е поскапо од стариот добар карбуратор, не можете да го поправите во својата гаража или покрај патот и неможе да се поправи без скапа и компликувана опрема. Со паметни ECU трикови, тоа помага да помине на тестовите за емисии на ЕУ и исто така може да помогне во намалената потрошувачка на моторциклот. Но дали тоа е толку голема работа? Ако некогаш сте возеле постар мотор, ќе знаете како изгледа суров мотор. Ако отсекогаш сте возеле мотори кои имаат вбризгување на гориво тогаш вие сте ја возеле само верзијата безбедна за консумирање.

ABS и контролата на тракција се очигледно полезни, но – како што производителите секогаш напоменуваат- тие можат да се исклучат. Меѓутоа, голем број на мотоцикли се продаваат само со ABS и контрола на тракција. И покрај тоа што можете да ги исклучите не можете да ја намалите цената на моторот. Поголема цена на моторите значи дека помалку луѓе ќе започнат или ќе продолжат со возење.

Потоа дојдоа „power mods“, кои во повеќето случаи се бесполезни како огромниот број на копчиња за подесување на машината за миење садови. Дали навистина ви требаат три различни „power mods“ на GSX-R600? Само ако тоа е вашиот прв мотор.

Ride by Wire ја воведува можноста да има различни мапи за гас и прилагодена чувствителност. Пред 20 години никој навистина не се мачеше да вози мотоцикл на дожд, тие само ја прилагодуваа својата десна рака соодветно.

Некои мотоцикли сега имаат електронски прилагодлива суспензија, а моделот на Ducati, Multistrada, го чита патот и прави прилагодувања како што патувате. Тоа воопшто не е евтино и го означува почетокот на крајот на едноставниот метод кој толку добро функционираше за Хенри Фурние во 1902 година.

Палење без клуч значи дека можете да го чувате вашиот „клуч“ во џеб, што е одлично се додека не заборавите во која јакна сте го оставиле клучот. Или тој беше во вашите фармерки? Дали клучот беше толку голем проблем што мораше да се поправи?

Кај некои мотори, електрониката изнесува 40% од трошоците за производство. Како што електрониката ги прави мотоциклите побезбедни, дали луѓето кои ги возат не ги учат вештините кои им се потребни за да останат безбедни? Дали додавањето на електрониката резултира со губење на вештината и се останува речиси исто? Дали електрониката ја комплицира некогаш едноставната равенка, додавајќи цена но без вистинска вредност? Дали гледаме прилив на технологија само за доброто на технологијата?

Електроника. Дали тоа ја уништува убавината и за вас?