Промотерот на MotoGP шампионатот, Dorna, се соочува со сериозен стратешки предизвик во обидот да ја балансира националната застапеност на возачите во кралската класа. Иако спортот е глобален производ, доминацијата на шпанските и италијанските натпреварувачи создава недостиг од простор за таленти од други земји, што според челниците на шампионатот, може да влијае на комерцијалниот раст.
Историски гледано, MotoGP претрпе голема трансформација. Додека во минатото категоријата беше доминирана од Британци, Американци и Австралијци, денешната слика е драстично поинаква. Со победата на Педро Акоста, бројот на шпански возачи кои победиле во MotoGP достигна 17, а вкупниот број на победи на Шпанците од 1992 година изнесува 221, придружени со 13 светски титули од 1999 година наваму.
Оваа доминација е резултат на долгогодишната стратегија на Dorna за развој на мотоциклизмот во Шпанија, која започна во 90-тите години. Сепак, успехот создаде ситуација во која традиционални сили како Велика Британија, Германија и САД моментално немаат ниту еден претставник во MotoGP. За 2026 година, гридот брои 9 шпански и 6 италијански возачи, додека останатите места се поделени меѓу двајца Французи и по еден возач од Колумбија, Јапонија, Турција, Бразил и Австралија.
Недостатокот на разновидност во националностите не му одговара на промотерот на шампионатот
Промените продолжуваат и во 2027 година. Иако Алекс Ринс и Маверик Вињалес нема да бидат дел од гридот, нивните места ќе ги пополнат Даниел Холгадо и Изан Гевара. Давид Алонсо, кој се натпреварува под колумбиско знаме, поседува и двојно државјанство. Овој „вишок“ на шпански возачи директно влијаеше на кариерите на некои таленти, како Ману Гонзалез, кој остана без место во MotoGP. Истовремено, заминувањето на Џек Милер во WSBK и Бред Биндер од шампионатот ja остава Јужна Африка без свој претставник, a Австралија ќе добие замена преку Сена Агиус.
На минатото ГП на Сан Марино, Шпанија ги зазеде првите 6 позиции, што е рекорд
Кармело Езпелета, првиот човек на Dorna, јасно ја истакна потребата од промена:
Мораме да гарантираме избалансиран грид на натпреварувачи. Нашата група инвестира многу во спортот бидејќи сакаме – и мораме – да растеме. Наша задача е да ги убедиме партнерите како функционира нашиот бизнис.Кармело Езпелета, извршен директор на Dorna
Сепак, за разлика од Формула 1, во мотоциклизмот талентот сè уште е пресуден фактор. Тимовите и производителите се фокусирани на ангажирање на најбрзите возачи, а моменталната реалност е дека тие најчесто доаѓаат од Шпанија или Италија, што го прави балансирањето на националностите исклучително тешка задача.
Коментари