Марк Маркез победи на спринтот во Мизано, Бецеки со нов рекорд на патеката

Марк Маркез ја однесе победата на спринт трката во рамките на Големата награда на Сан Марино, 14-тата рунда од овогодинешниот MotoGP шампионат. Со овој триумф, актуелниот шампион дополнително ја намали разликата во генералниот пласман во однос на лидерот Хорхе Мартин.

Маркез го презеде водството уште на стартот од Марко Бецеки, кој претходно освои пол-позиција со историски најбрз круг на патеката во Мизано. И покрај притисокот од Бецеки во завршницата, Маркез успеа да ја одбрани предноста и да ја запише својата шеста спринт победа сезонава.

Трката ја одбележа и тактичката разлика во изборот на гуми, каде Маркез се одлучи за мека задна гума, додека Бецеки настапи со средна компонента. Подиумот го комплетираше Хорхе Мартин, кој во директен дуел го совлада Фабио ди Џанантонио. Зад нив, трката беше проследена со инциденти, меѓу кои и оној на Фабио Квартараро, кој излета при обид за претекнување на Диого Мореира и на крајот заврши како последен, на 21-вата позиција.

Марк Маркез, MotoGP Мизано 2026. © Gold and Goose

Квалификации и рекорди во Мизано

Марко Бецеки доминираше во квалификациите, поставувајќи време од 1:29 минути, што е првпат во историјата на оваа патека некој да се спушти под границата од 1:30. Марк Маркез го заврши квалификацискиот дел на 0,198 секунди зад него, додека Фермин Алдегер го комплетираше првиот стартен ред. Фабио ди Џанантонио, кој беше во игра за високи позиции, падна во завршницата и трката ја започна од четвртото место, веднаш пред лидерот во шампионатот, Хорхе Мартин.

Марко Бецеки, MotoGP Мизано 2026. © Gold and Goose

Викендот во Мизано е исклучително тежок за Франческо Бањаја. Италијанецот се соочи со технички проблеми и пад во квалификациите, што резултираше со 14-то стартно место, што е негов најлош квалификациски резултат на домашната патека во кариерата, а финишираше на 13-та позиција. Во меѓувреме, Јохан Зарко доби казна од три места на стартната решетка за неделната трка поради попречување на Бецеки, но трката ја заврши на 10-та позиција.

Состојба во шампионатот

Борбата за титулата се интензивира, Хорхе Мартин сега има 14 поени предност пред Маркез, а Бецеки заостанува 22 поени. Аи Огура, кој е петти во генералниот пласман, не настапува викендов во Мизано поради повреда на раката, а Маверик Вињалес го пропушта третиот настан по ред. На неговото место во Tech3 KTM повторно е тест-возачот Пол Еспаргаро кој заврши на 16-та позиција. Франко Морбидели, пак, ќе мора да отслужи „long lap“ казна во неделната трка поради бавно возење и попречување на Енеа Бастианини за време на петочните тренинзи.

Франческо Бањаја, MotoGP Мизано 2026. © Gold and Goose

Резултати од трката