Од денеска и официјално започнува примената на измените со кои возачите со Б категорија ќе можат да управуваат мотоцикл до 125 см³, но само под точно утврдени услови и по задолжително помината четиричасовна теоретска обука во автошкола.
По изгласувањето на законските измени, за кои веќе пишувавме во текстот „Официјално, со Б категорија ќе може да се вози до 125цц!“, сега е објавен и Правилникот во Службен весник, со што се заокружува процедурата за практична примена на оваа новина.
Правилникот е објавен во Службен весник
Во Службен весник број 113, објавен на 27 мај 2026 година, под точка 1656 е објавен Правилникот за содржината на обуката, формата и содржината на потврдата, како и начинот на водење евиденција за издадени потврди за посета на четири часа теоретска обука за управување со мотоцикл до 125 см³.
Според член 1 од Правилникот, обуката се однесува на управување со мотоцикл до 125 см³ со автоматски менувач од категоријата А1, чија работна зафатнина на моторот не е поголема од 125 см³, силата на моторот не е поголема од 11 kW, а соодносот на јачината на моторот и масата на возилото не надминува 0.1 kW/kg.
Ова значи дека правилото не се однесува на сите мотоцикли до 125 см³, туку конкретно на мотоцикли од А1 категорија со автоматски менувач, во рамките на наведените технички ограничувања.
Кој ќе може да вози 125cc со Б категорија?
Според информациите од Министерството за внатрешни работи, задолжителната обука се однесува на лица кои имаат наполнети 23 години и поседуваат најмалку пет години важечка возачка дозвола од категорија Б.
За помладите од 23 години, како и за лицата кои немаат најмалку пет години Б категорија, и понатаму важи обврската да полагаат за соодветна мото категорија.
Важно е да се нагласи дека не смее да се управува со мотоцикл до 125 см³ само врз основа на Б категорија, доколку претходно не е помината теоретската обука и не е обезбедена потврда од автошкола.
Кратко и јасно
- Може да се вози: мотоцикл до 125 см³ од категорија А1, со автоматски менувач.
- Максимална сила: до 11 kW.
- Услов за возачот: најмалку 23 години возраст.
- Возачко искуство: минимум 5 години важечка Б категорија.
- Обврска: задолжителна 4-часовна теоретска обука во автошкола.
- Потврда: автошколата издава потврда, а МВР води електронска евиденција.
- Важно: не смее да се вози само со Б категорија, без помината обука и потврда.
Што опфаќа четиричасовната теоретска обука?
Во член 2 од Правилникот е наведено дека теоретската обука се состои од неколку наставни целини кои се поврзани со безбедноста и основните правила при управување со мотоцикл.
Обуката ги опфаќа следните теми:
- заштитна опрема и безбедност при управување со мотоцикл;
- основи на управување со мотоцикл, односно контрола, стабилност и положба на телото;
- превоз на сопатник и однесување во сообраќај;
- ризици и опасности при управување со мотоцикл во различни услови на патот.
Станува збор за теоретска, а не практична обука, која треба да им даде на возачите основни информации за безбедно учество во сообраќајот со мотоцикл.
Потврдата ќе ја издава автошколата
По завршувањето на четиричасовната обука, автошколата ќе издава официјална потврда за посетена обука. Според Правилникот, потврдата се издава на хартија во бела боја, на образец во А5 формат.
Евиденцијата за издадените потврди ќе ја води Министерството за внатрешни работи, електронски, врз основа на известувањата што ќе ги доставуваат автошколите.
Арсоски: Целта е поголема мобилност и помал сообраќаен метеж
Пратеникот Павле Арсоски, еден од иницијаторите и подносителите на ова законско решение, соопшти дека со објавувањето на Правилникот во Службен весник процесот е заокружен и измените стапуваат на сила.
„Суштината на измените на Законот е во Македонија, возачите кои поседуваат возачка дозвола од Б категорија, да имаат право да управуваат мотоцикли со автоматски менувач од категоријата А1, откако ќе наполнат 23 години, поседуваат минимум 5 години важечка возачка дозвола од категорија Б и поседуваат потврда за посета на 4-часовна теоретска обука.“
Арсоски додава дека ваквото решение треба да го поттикне користењето на помали и поекономични моторни возила, да го намали сообраќајниот метеж во урбаните средини и да ја подобри мобилноста на граѓаните.
Според него, мотоциклите се практично и економично превозно средство кое зафаќа помалку простор и на улиците и при паркирање, а нивното користење може да придонесе за поефикасен градски превоз.
Не заборавајте: потребна е потврда пред да се вози
Иако измените стапуваат во сила, најважната порака за сите возачи е дека не смеат да управуваат мотоцикл до 125 см³ без претходно помината теоретска обука и издадена потврда од автошкола.
Новото правило отвора можност за полесно користење на помали мотоцикли и скутери во секојдневниот сообраќај, но истовремено ја задржува безбедносната рамка преку задолжителна обука, минимална возраст и потребно искуство со Б категорија.
Коментари