Тито Рабат им се приклучи на Макс Бијаџи, Марко Меландри и Алваро Баутиста и ќе се обиде да направи успешен премин од MotoGP во WorldSBK.

Тито Рабат стана последниот возач кој ќе премине од MotoGP во WSBK серијата откако потпиша договор со Barni Ducati за сезоната 2021. Шпанецот беше дел од MotoGP уште од 2016 година. Претходно тој ја освои титулата во Moto2. 

Вкупно помина пет години во Премиерната класа, но не успеа да остави голем впечаток. Најдобар пласман му беше седмото место кое го постигна додека возеше за Marc VDS Honda и Avintia Ducati.

Иако и следната сезона требаше да вози за Avintia, Рабат одлучи да се повлече од договорот и да премине во WorldSBK каде ќе вози со Ducati Panigale V4 R. Неговото место во Avintia го презеде Лука Марини.

„После неколку години во MotoGP имам можност да почнам нова авантура во WorldSBK и сакам тука да го покажам мојот потенцијал. Знам дека на располагање имам добар мотоцикл и добар тим и поради тоа сакам да им искажам благодарност на Barni Racing Team и Ducati. “

„За мене новиот предизвик почна денеска кога за прв пат се качив на Ducati Panigale V4 R. Со нетрпение чекам да излезам на патеката. Ветувам дека ќе работам напорно и дека ќе бидам подготвен за првиот тест. “

„Многу сум среќен од договорот кој го постигнавме со Тито. Кога зборував со него видов дека има ист пристап кон работата“, додаде Марко Барнабо.

„Голема посветеност и одлучност да се исполнат нашите цели. Тимот е подготвен и ќе му пружиме се што му е потребно за да постигне добри резултати.“