Леон Хаслам ќе му се приклучи на официјалниот Супербајк тим на Honda и ќе биде нов тимски колега на Алваро Баутиста.
Леон Хаслам ќе го напушти фабричкиот тим на Kawasaki и ќе настапи за тимот на Honda во 2020 година. Тој ќе му се приклучи на Алваро Баутиста и следната година ќе настапи со новиот Fireblade.
Откако доминираше во Британскиот шампионат во сезоната 2018, Хаслам се врати во WSBK серијата минатата година но имаше слаб настап со тимот на Kawasaki. Голем проблем му беа и повредите а сезоната ја заврши на седмата позиција.
Сепак Хаслам со себе ќе донесе и големо искуство, со оглед на тоа дека има повеќе од 250 стартови во досегашниот дел од кариерата.
Иако се уште нема официјална потврда за договорот, има шпекулации дека веднаш по трката во Катар, Хаслам заминал за Јапонија и веќе бил дел од подготовките на тимот. Се очекува за време на EICMA мото шоуто да добиеме и официјална потврда за оваа информација.
Хаслам досега шест пати се искачи на подиумот во WorldSBK серијата со тимот на Honda. Во 2008 година настапуваше за HM Plant, а исто така има возено и за Stiggy Honda и Ten Kate Honda. Покрај ова, тој е трикратен победник на трката Suzuka 8 Hours.
Формата која ја има покажано Хаслам на трката Suzuka 8 Hours сигурно била дел од факторите кои влијаеле на одлуката. Тој беше дел од победничкиот тим на Kawasaki оваа сезона а Honda се надева дека Хаслам заедно со Баутиста и Такуми Такахаши, ќе биде дел од бората за победа следната година.
2019 беше исклучително тешка година за Honda во WorldSBK серијата а тимот поголем дел од времето го потроши на собирање на податоци. Не смее да се забориви ниту повредата на главниот возач Леон Камиер.
Тимот и мотоциклот ќе претрпат големи промени следната година. Одговорен за проектот ќе биде Алберто Пуиг а се очекува Шпанецот во тимот да донесе и неколку луѓе од MotoGP серијата.
