Марко Меландри ја претвори првата пол позиција во сезоната во победа на првата трка на патеката Motorland Aragon во Шпанија.

Одличните услови за трка на патеката Motorland Aragon во Шпанија ни донесоа возбудлива прва трка од седмата рунда во Светскиот Супербајк. Првата пол позиција за Марко Меландри во сезоната му донесе одличен старт на италијанецот, но Макс Бијаџи веќе во вториот круг ја превзема првата позиција од својот сонародник и долго време се задржа на неа.

Следевме интересно возење на Карлос Чека, кој полека но сигурно напредуваше кон врвот се до кобниот момент во осмиот круг кога излета од патеката. За среќа излетувањето заврши без никакви последици за Чека, но тоа беше прв пад за него во сезоната. Кога сме кај излетувањата, трката не ја завршија ни Фабрицио, Ланци и Шмрц.

Интересна борба следевме и за четвртата позиција, помеѓу Том Сајкс и Норијуки Хага, а веднаш зад нив во постојан дуел беа Лаверти и Ласкорц. На пет круга до крајот возачот на Јамаха успеа да го помине и Сајкс со тоа оставајќи ги двата возачи на Кавасаки на петтата и шестата позиција.

Во истиот круг започна и вистинската борба за првата позиција, мала грешка на Бијаџи го доведе Меландри на првата позиција, трпеливоста на Марко конечно се исплатеше бидејќи возеше зад тркалото на Бијаџи во текот на целата трка. Од третата позиција полека но сигурно се доближуваше и Камиер, клубскиот колега на Макс Бијаџи. Во следниот круг Меландри веќе имаше предност од половина секунда, а предноста на Бијаџи пред Камиер се топеше.

Лаверти до крајот успеа да го помине и Хага, а мртвата трка помеѓу четворицата (Лаверти, Хага, Сајкс и Ласкорц) траеше до самиот крај. Во последниот круг и Том Сајкс успеа да го помине Хага.