Христијан Илиоски на патеката Милци

Нашите најдобри кросисти, Христијан Илиоски и Гоце Томовски забележаа победи во своите класи, а одличен настап имаше и повратникот Благојче Спировски на мотокрос трката која викендов се возеше во Воден.

На трката која се возеше во рамките на Отвореното првенство во мотокрос на Грција учествуваа тројца наши претставници, Христијан Илиоски и Благојче Спировски во класата МХ2 и Гоце Томовски во класата МХ1.

"Убава трка, сите тројца имавме добар пласман, мене ми е криво само што не ја завршив првата трка" - изјави Илиоски за мотори.ком.мк. "Доживеав пад во на стартот на првата трка, до крајот успеав да ги стасам скоро сите, но во моментите кога бев на петтата позиција ауспухот на моторот падна па морав да се откажам од трката. Во втората трка го решивме проблемот со моторот и завршив на првата позиција."

Благојче Спировски на трката во Гевгелија

Благојче Спировски забележува одлични резултати по враќањето на патеките. Откако го освои второто место на трката во Гевгелија минатата недела, на трката во Воден го освои четвртото место. Како што вели и самиот, "воља, тренинг и верба во Бог е страшна работа" :)

Гоце Томовски

Гоце Томовски имаше одличен настап во класата МХ1 каде го освои првото место. На трката сите 20 возачи настапија во една дивизија, а трките поминаа без инциденти.