Доминација на Хонда во Малезија

Дани Педроза на денешните квалификации за МотоГП трката за ГН на Малезија дојде до втората пол позиција во сезоната откако забележа најдобро време на патеката. Педроза беше најбрз и во подготвителниот период остварувајќи најдобри времиња на сите три тренинзи пред почетокот на трката. Успехот на Хонда го потврди сега веќе новиот шампион Кејси Стонер, а за целосно задоволство во тимот се погрижи Довициозо заокружувајќи ги првите три места.

Ако за Хонда цветаат рози во Малезија, за Јамаха е спротивното. Хорхе Лоренцо сеуште закрепнува од операцијата на прстот по падот во Австралија па на негово место ќе го видиме Катсујуки Накасуга, а Бен Спиз објави дека нема да вози на утрешната трка. Американецот забележа два пада на тренинзите па по консултациите со тимот, Јамаха одлучи Бен Спиз да остане во боксот. Спиз негодуваше на оваа одлука бидејќи доколку не настапи на утрешната трка Марко Симончели најверојатно ќе го превземе петтото место од Американецот во генералниот пласман. Во моментот Симинчели има 17 бодови помалку, а до крајот на шампионатот преостануваат само уште две трки.

Дукати полека успева да ја намали разликата од водечките но сеуште се далеку од добра форма, Ники Хејден трката ќе ја започне од шестата позиција, а Валентино Роси од деветата. Докторот последната победа ја забележа токму на патеката Сепанг во Малезија, но тоа беше минатата година кога сеуште возеше за Јамаха.

Утрешната трка започнува во 10.00 часот, а пренос можете да слушате на Life Radio 89.1MHz