Марк Маркез дојде до шестата победа во шампионатот и со тоа остана на првата позиција во генералниот пласман на само четири трки до крајот.

Маркез при допирот го скинал кабелот за контрола на тракцијата што придонесе Педроса да летне од моторот

Марк Маркез дојде до шестата победа во шампионатот и со тоа остана на првата позиција во генералниот пласман на само четири трки до крајот.

Маркез кој ја започна трката од пол позицијата го загуби првото место од Хорхе Лоренцо на самиот старт. Возачот на Јамаха веднаш успеа да направи разлика за која сите мислеа дека веќе е недостижна, но двајцата возачи на Хонда веднаш ги демантираа.

Дани Педроса успеа да го помине Маркез во петтиот круг од трката и притоа да ја стопи предноста на Лоренцо, но во шестиот круг се случи она што никој не го посакуваше и ретко се гледа во МотоГП. При влезот во свиокот Маркез направи лоша проценка, излезе широко и при враќањето назад дојде до мал допир со моторот на Педроса. За жал при контактот Маркез го скинал кабелот за контрола на тракцијата на хондата која ја возеше Педроса и веднаш потоа бевме сведоци на брутален хајсајд за Дани.

За Педроса ова е уште еден удар во кариерата, тој постојано е на врвот, а никако да дојде до толку посакуваната шампионска титула. Ако се знае дека на четири трки до крајот во генералниот пласман тој заостанува со 59 бода зад водечкиот Маркез, можеме да кажеме дека ќе треба да се случи чуда за оваа сезона Педроса да ја освои титулата.

По инцидентот Маркез заостануваше 2 секунди зад Лоренцо, разлика која успеа да ја стопи, а веднаш потоа и да го помине Лоренцо на патот кон шестата победа во сезоната.

Валентино Роси успеа да се искачи на подиумот откако водеше вистинска борба за третата позиција со Алваро Баутиста. Во борбата за третата позиција беа и Штефан Брадл како и Кал Крачлоу кои ја сочинуваа четворката која возеше на 12 секунди зад водечкиот Маркез.

Следната трка во МотоГП шампионатот се вози на патеката Сепанг во Малезија на 13-ти октомври.