Доминација на шпанските возачи пред домашната публика

Доминација на шпанските возачи пред домашната публика

Одличен настап на Хорхе Лоренцо кој ја постигна својата трета победа во 2013 година. Веднаш зад него беа возачите на Хонда, Дани Педроса и Марк Маркез. Лоренцо имаше одличен старт и после само неколку метри беше изедначен со Дани Педроса кој стартуваше од првиот ред. После првиот свиок Лоренцо го превзеде водството и остана таму до крајот на трката. На моменти се чинеше дека двете Хонди ќе можат да одржат чекор со лидерот, но на неколку круга до крајот стана јасно дека нема да можат да го престигнат возачот од Мајорка.

Кал Кратчлоу, кој стартуваше од втората позиција и Валентино Роси силно се бореа за да го задржат чекорот со водечкото трио. На крајот, задачата се покажа како премногу тешка за Кратчлоу кој излета на 20 круга пред крајот на трката. Роси заврши на четвртото место-разликата од речиси шест секунди со тимскиот колега Лоренцо треба да биде причина за загриженост кај деветкратниот светски шампион кој сеуште ја очекува првата победа.

Кратчлоу не беше единствениот возач кој излета од патеката. Баутиста и Лаверти не успеаа да комплетираат ниту еден круг, а во текот на трката паднаа и де Пуние, Ианоне, Хејдн и Барбера. Тоа остави простор за останатите возачи. Британецот Бредли Смит заврши на шестото место, негов најдобар резултат оваа сезона. Неговото достигнување е уште поголемо со оглед на фактот дека речиси го уништи прстот на трката во Муџело минатата недела.