Марк Маркез забележа најдобар резултат на вториот ден од пред сезонскиот тест на патеката Сепанг во Малезија.

Марк Маркез забележа најдобар резултат на вториот ден од пред сезонскиот тест на патеката Сепанг во Малезија.

Временските прилики исто како и на вчерашниот тест беа променливи, па затоа тимовите и возачите се обидоа да го извадат максимумот од утринските часови кога температурата беше висока. Актуелниот Светски шампион со време од 1’59.844 се искачи на првата позиција на провизорната листа, и беше првиот човек кој возеше под границата од две минути.

Времето на Маркез сеуште е за една секунда побавно од она кое го постави на првиот пред сезонски тест на истата патека, но сепак е импресивно имајќи ги во предвид условите на патеката.

Хорхе Лоренцо на денешниот тест дојде до втората позиција со време од 1’59.902 кое го оствари на 30-от круг, и на крајот беше за само 5 стотинки побавен од Маркез. Возачот на Јамаха го тестираше новиот менувач на неговата YZF-M1, како и целокупното подесување на моторот.

Импресивен резултат забележа и Андреа Довициозо на Дукати. Тој заедно со Андреа Ианон тестираше неколку различни подесувања на моторот, што придонесе да забележи време кое е за цела секунда подобро од она на вчерашниот тренинг.

Валентино Роси тестираше две различни предни вилушки, додека пак Дани Педроса работеше на суспензијата на моторот. Ним очигледно поважно им беше да го сетираат моторот според нивните потреби отколку да се бркаат со времето на останатите. 

Тимот на Априлија повторно имаше проблеми, Алваро Баутиста не успеа да го повтори успехот од вчера, а Марко Меландри и покрај тоа што се обиде со шасија која е слична на онаа која ја возеше во Супербајк не успеа да напредува од последната позиција.

За разлика од Априлија, тимот на Сузуки продолжува со импресивните резултати, Алеш Еспергаро намали уште половина секунда од неговиот вчерашен резултат, а истото го направи и Маверик Вињалес. Тимот денеска работи на подобрување на електрониката што треба дополнително да ги подобри резултатите на Сузуки.