24
Пон, Јул
Интервјуа

Интервју: Том Сајкс

motori tom-sykes-4За време на нашиот престој на патеката Мизано во Сан Марино имавме прилика да направиме и неколку ексклузивни интервјуа. Првото кое го објавуваме е она со возачот на Кавасаки тимот, Том Сајкс.

Следете нè на:

 

tom-sykes-5

За време на нашиот престој на патеката Мизано во Сан Марино имавме прилика да направиме и неколку ексклузивни интервјуа. Првото кое го објавуваме е она со возачот на Кавасаки тимот, Том Сајкс.

Возачот на Кавасаки по седум извозени рунди во генералниот пласман се наоѓа на третата позиција со заостанување од 8 бодови зад второпласираниот Џонатан Реа, и 46 зад водечкиот Макс Бијаџи. До сега во сезоната тој има забележано 6 пол позиции, 1 победа и 6 подиуми.

tom-sykes-3

Ајде да почнеме од почеток, да им доловиме на нашите читатели кој е Том Сајкс. Кога за прв пат започна да возиш, а потоа и да се тркаш?
- Започнав со тркање во 2000-та година, кога имав 14 години, но пред ова возев оф-роуд уште во времето кога имав 6-7 години. Инаку роден сум и растен во Британија, таму започнав со трките, најпрво во Британскиот Супербајк. Потоа следуваа две возења во Светскиот Супербајк шампионат во 2008-ма со две вајлд карти. Оттогаш се натпреварувам во ВСБК, за тимот на Кавасаки.

Имајќи во предвид дека Кавасаки е јапонски тим со шпански сопственик, каква е атмосферата во тимот?
- Одлична, атмосферата е прекрасна, се е релаксирано и сите си ја работат својата работа. Знаете, одлично е кога имате 6 пол позиции од 7 трки, резултатите навистина помагаат за атмосферата во тимот да биде на потребното ниво.

Засега ова е твојата најдобра сезона во кариерата, какво е чувството?
- Засега сум задоволен од резултатите и уверен сум дека имаме капацитет да застанеме на врвот. Нема да биде лесна работа, но знаеме каде сме, а тоа е навистина важно. Механичарите работат одлично и моторот е во прекрасна форма, имаме проблем единствено со температурата, па затоа на патеки како Солт Лејк Сити и Мизано имаме проблем да ја одржиме формата. Кога надворешната температура е висока, машината не може доволно долго да се носи со жештината па темпото за кусо време опаѓа. Сепак ќе повторам, знаеме каде е проблемот со моторот, и работиме напорно да го решиме тој дел, се останато е перфектно за што зборат и резултатите.

tom-sykes-1Поглед на „кавата“ со која Сајкс ја вози најдобрата сезона во кариерата

Има многу шпекулации за твојата иднина во МотоГП, порано или покасно тоа и ќе се случи имајќи ги во предвид твоите резултати. Хипотетички да позборуваме, доколку добиеш понуда за следната сезона да настапиш во МотоГП, а истовремено дознаваш дека Кавасаки се враќа во шампионатот во 2014 и ќе имаш шанса да возиш за нив. Ќе останеш ли лојален на зелениот тим?
- Уф, тешко прашање.. знаете за мене не толку важно во кој шампионат возам, она што ми е важно е да уживам во она што го правам, а во моментов тоа е возењето Супербајк за Кавасаки. Секако дека би сакал да се обидам во МотоГП, и доколку добијам примамлива понуда не гледам зошто да не ја прифатам. Е сега во однос на тоа дали би чекал или би се префрлил веднаш... незнам :)

tom-sykes-2Имаш 26 години, наскоро ќе наполниш 27, уште колку години се гледаш во мото трките?
- Млад сум да размислувам за повлекување или нешто слично, има многу возачи кои се активни и по 40-та година, па додека не ги стигнам нив не ни помислувам на нешто такво. Всушност ќе возам мото трки се додека можам и додека ми е убаво.

Какви се односите помеѓу тебе и останатите возачи во Супербајк шампионатот? Минатата година бевме сведоци на неколку инциденти во кои беше вклучен Макс Бијаџи.
- Имам одлични односи со сите, знаете јас разговарам отворено со возачите. Немам проблем да направам муабет со било кој од нив, вклучувајќи го и Бијаџи. Ова посебно се однесува на оваа сезона кога Кавасаки направи одличен мотоцикл и сме на самиот врв, па така Макс е оној кој има проблем со тоа, но како што кажав разговарав со него и мислам дека засега немаме лични проблеми.

Кој е твојот омилен мото возач?
- Кога растев мои идоли беа Мик Дуан и Карл Фогерти, но во никој случај не би го заборавил Валентино Роси. За мене е несватливо како луѓето го забораваат веднаш и само затоа што има две лоши сезони го отпишуваат. Никој не смее да заборави кој е Валентино Роси и што се има направено, и мислам дека му треба само уште малку време да се навикне на новиот мотор, за повторно да покаже кој е кој.

Спомена дека уште како дете си возел крос, си размислувал ли да го промениш шампионатот?
- Не! Барем не за мотокрос, но да бидам искрен би пробал да возам нешто на четири тркала. За мене интересен е ДТМ шампионатот, но би возел и рели.

Каква е ситуацијата дома во Британија, имаш ли третман на ѕвезда?
- Нема да те лажам, кога сум на островот ретко, навистина ретко кој ме препознава. Луѓето не се толку многу заинтересирани за мото спортот. На пример доколку играв фудбал дури и во некоја споредна лига мислам дека ќе имав подобар третман отколку сега. Не се жалам на тоа, едноставно такви се работите во Англија.

Каков е твојот став во однос на безбедноста во мото спортот, веќе следната недела ќе стапнеш на лудиот камен, и во иднина сигурно ќе имаш принова. Дали ова ќе влијае на тебе и дали би им дозволил на своите деца да се занимаваат со мото спорт?
- Да така е, следната недела ќе се женам, а здравје во иднина кога ќе имам и деца мислам дека тоа нема да промени ништо во мојот став кон мото спортот. Трките знаат да бидат и опасна работа но никој не мисли на тоа додека вози. Искрено јас и би сакал да добијам момче кое ќе ја дели мојата страст кон мото трките. Такво е моето размислување сега, незнам, можеби ќе се промени тоа кога ќе имам деца, но засега сум со таков став.

tom-sykes-4

За крај, имаш ли некаква порака за возачите од Македонија?
- Само да им порачам да ги следат своите соништа. Ништо не е невозможно, и никогаш не треба да се откажуваат. Се сe може доколку навистина се сака, знам дека имаат многу пречки во однос на финансиската поддршка и техничките можности, но сепак, треба само напорно да работат и се ќе си дојде на свое место.

Присуството на патеката Мизано во Сан Марино за трката од Супербајк Шампионатот беше овозможено од Динамикс.

comments

Би можело да ве интересира

А2 мотоциклите се мостот за оние возачи кои не сакаат повеќе да возат мотоцикли со зафатнина од 125cc но кои се уште не можат да возат мотоцикли од А категорија.

Полицијата од Јужен Шилдс се обдува да го спречи антисоцијалното однесување од страна на мотоциклистите со помош на дронови, а цел на дронот се возачите за кои имаат информации дека возат невнимателно.

Кога сакате да се возите со некој пријател но не сакате тој да седи заедно со вас на мотоциклот, или пак кога треба да пренесете голем број на работи, тогаш страничната приколка за мотоцикл е токму она што ви треба. Погледнете ги овие пет навистина интересни приколки.

Suzuki Gixxer купот ја започна својата трета сезона, како и секогаш со несебична поддршка од страна на Motul. Од 7-ми до 9-ти јули на патеката Кари во Коимбаторе (Индија), посетителите имаа можност да уживаат во новите аспекти кои ги воведоа организаторите со цел уште повеќе да го подобрат концептот на натпреварувањето.

Уште еден дел од сложувалката за 2018 година си дојде на свое место. Во понеделникот, Aspar потврди дека Алваро Баутиста го продолжи договорот и ќе остане дел од тимот и во 2018 година.

MotoGP мотоциклите во последниот период станаа неверојатно комплицирани и на рачките има голем број на копчиња за контрола на возењето. Но Скот Рединг од тимот на Pramac Ducati ќе ни го објасни значењето на секое од нив посебно.

Бидете информирани за сите новости директно на вашата е-маил адреса
Реклами

Ви благодариме

Close

За тоа што споделувате содржини и го поддржувате нашиот веб сајт, Ви благодариме!